هاجر أحمد تطالب الذكاء الاصطناعي بإنقاذ “أطفال الفن”

24 يونيو 2023

القاهرة-عمرو يوسف

كشفت الفنانة هاجر أحمد عن معاملة غير إنسانية يتعرض لها “الأطفال الرضع” وبخاصة حديثى الولادة، أثناء تصوير الأعمال الفنية والإعلانات التجارية، وطالبت باستغلال تقنيات الذكاء الاصطناعي لتعويض التصوير الحقيقي للأطفال الرضع، وقالت أن هؤلاء الرضع يتم تعريضهم للخطر بدون رحمة مقابل مبالغ قليلة جدا ووجهت انتقادات حادة للآباء والأمهات.

وكتبت هاجر أحمد عبر خاصية الاستوري بحسابها على انستغرام: هل الذكاء الاصطناعي أخر تطورات التكنولوجيا في العالم ميقدرش يساعدنا إن احنا نوقف استخدام الأطفال حديثي الولادة، اللي أعمارهم لا تتعدى أسبوع في التصوير في السينما أو الدراما أو إعلان؟

أضافت هاجر أحمد: منقدرش نوقف استخدام الأطفال الرضع اللي هما لا يعوا أي شئ حولهم حبايبي الملايكة، اللي كل ذنبهم إن عندهم أم أو أب لا يستحقوا الكلمة دي ومفيش عندهم ذرة رحمة ويجروا يعملوا كده عشان أكبر مبلغ ممكن ياخدوه في اليوم للطفل اللي عمره ما يكملش أسبوع هو 50 دولار وأعتقد إن المبلغ كمان أقل من كده”.

وتابعت هاجر أحمد: معقول طفل عمره ما يتعداش أسبوع المفروض يكون لسه في المستشفى أو تحت إشراف طبي، وأمه اللي جابته الدنيا اللي هي السبب في وجوده تاخده مواقع تصوير كلها تراب ودخان سجاير وصوت عالي وحر أو برد بدون أي رحمة، وممكن المشهد يفضل ساعة أو ساعتين بدون رضاعة أو تغيير، معقول حد يقبل بكده؟ .. حاجة مؤلمة جدا ومتعبة نفسيا جدا.. برجو من ربنا بجد إن الذكاء الاصطناعي ده يرحم الأطفال دول مادام أهلهم مش راحمينهم”.

واختتمت حديثها قائلة: “ربنا يرحمهم ويوظف الذكاء الاصطناعي ده ويحل محل الأطفال الغلابة دول في التصوير ونوقف المهزلة دي في العالم كله .. الحقيقة لو ده حصل هيكون أعظم إختراع وأهم إختراع إنساني في العالم كله”.