تامر حسني يدعم مدرب التمثيل رامي نادر: الكلمة المحبطة ممكن تقتل

24 سبتمبر 2023

القاهرة – عمرو يوسف

حرص الفنان تامر حسني، على دعم مدرب التمثيل رامي نادر، بعدما وصفه أحد متابعيه بـ كومبارس، وحذر تامر رواد مواقع التواصل الاجتماعي من عواقب التعليقات الجارحة والقاسية، مؤكدا أنها “تكسر القلب” ومن الممكن أن تؤدي إلى الوفاة.
تامر حسني أضاف عبر حسابه على موقع الفيس بوك: “لفت نظري البوست ده، أستاذ رامي أنت فنان محترم وردك حقيقي راقي، رغم تعرضك لكلام محبط أنت مردتش الإساءة بالإساءة، وده له اعتبار كبير أوي فوق ما تتصور عند ربنا قبل البشر، وممكن تكون جواك زعلت بس أكيد التعليق اللي زعلك ده ممكن يكون سبب في حاجة تفرحك قريب”.

وواصل تامر في منشوره: “وهتشوف كلامي وأنا شخصيًا مكنتش عارف إنك بتمرن تمثيل، وعرفت من البوست ده، وهبعتلك شباب يتمرنوا عندك وأتمنى أقابلك وأتعرف عليك ونفتح باب شغل مع بعض، وأتمنى من الشاب اللي كتبلك كده إنه يراجع نفسه وميحاولش يحبط حد تاني لإن الكلمة المحبطة فعلًا ممكن تموّت بجد ويكون تأثيرها أكبر من السلاح”.
وأضاف تامر حسني: “التعليق السلبي اللي أي حد بيكتبه بمنتهى البساطة وهو في بيته بيضحك، ممكن يكون سبب في قتل حد نفسيًا أو يكون سبب في تدمير أسرة أو سبب في جرح روح كانت فرحانة ومتفائلة وبسببك كل ده اتهد، ربنا يوفقك يا فنان يا محترم”.
واختتم تامر حسني حديثه: “يا شباب خلونا رحيمين على بعض عشان ربنا يرحمنا، عشان كل ما بقيت رحيم في كلامك هتلاقي ربنا بيسخرلك في عز زعلك وإحباطك ناس تفرح قلبك بالكلام الرحيم اللي يقويك على الدنيا”.